హైదరాబాద్‌లో సైబర్ క్రైమ్ పోలీసులు నిర్వహించిన దర్యాప్తులో సినిమా పైరసీకి పాల్పడిన కిరణ్ అనే వ్యక్తిని అరెస్ట్ చేశారు. ఈ కేసులో దర్యాప్తు సందర్భంగా సినీ ఇండస్ట్రీకి రూ. వందల కోట్ల నష్టం వాటిల్లినట్లు కీలక విషయాలు వెలుగులోకి వచ్చాయి.
కిరణ్, ఒక ఏసీ టెక్నీషియన్‌గా పనిచేస్తూ, 2019 నుంచి ఇప్పటి వరకు 65 సినిమాలను పైరసీ చేసినట్లు తేలింది. వీటిని వివిధ వెబ్‌సైట్లకు విక్రయించి, ఒక్కో సినిమాకు రూ. 40,000 నుంచి రూ. 80,000 వరకు సంపాదించాడు. ఈ చెల్లింపులు క్రిప్టో కరెన్సీ రూపంలో కమీషన్‌గా అతడికి చేరేవి. ఇటీవల విడుదలైన #సింగిల్ సినిమాను కూడా పైరసీ చేసినట్లు గుర్తించారు.
దీంతో ఫిల్మ్ ఛాంబర్‌లోని యాంటీ పైరసీ సెల్ ప్రతినిధి యర్ర మణీంద్ర బాబు ఫిర్యాదు చేయడంతో, సైబర్ క్రైమ్ పోలీసులు కేసు నమోదు చేసి, రెండు రోజుల క్రితం కిరణ్‌ను అరెస్ట్ చేశారు. పైరసీ వల్ల సినీ ఇండస్ట్రీకి జరిగిన నష్టం గురించి దర్యాప్తు కొనసాగుతోంది. నిందితుడి కార్యకలాపాలపై మరిన్ని వివరాలు సేకరించేందుకు పోలీసులు తీవ్రంగా కృషి చేస్తున్నారు.
