తెలుగు చలనచిత్ర పరిశ్రమలో నిర్మాతలు ఎదుర్కొంటున్న సమస్యలపై ఫిలిం ఛాంబర్లో జరిగిన చర్చల్లో నాలుగు కీలక ప్రపోజల్స్పై సుదీర్ఘంగా చర్చ జరిగినట్లు అనీల్ వల్లభనేని తెలిపారు. ఈ సందర్భంగా ఆయన మీడియాతో మాట్లాడుతూ రెండు ప్రపోజల్స్కు తాము ఆమోదం తెలిపామని, మిగిలిన రెండు ప్రపోజల్స్ పై యూనియన్లతో చర్చించి నిర్ణయం తీసుకుంటామని వెల్లడించారు.
అనీల్ వల్లభనేని మాట్లాడుతూ… “ఈ సమస్యలను ఫిలిం ఛాంబర్ ప్రొడ్యూసర్స్ కౌన్సిల్లోనే సామరస్యంగా పరిష్కరించుకుంటాం. రేపు సెలవు కావడంతో ఎల్లుండి ఛాంబర్లో మరోసారి సమావేశం జరిగే అవకాశం ఉంది” అని పేర్కొన్నారు. సీనియర్ నటులు చిరంజీవి, బాలకృష్ణ ఈ విషయంలో అందరికీ న్యాయం చేస్తారని తమకు పూర్తి విశ్వాసం ఉందని ఆయన ధీమా వ్యక్తం చేశారు.
ప్రస్తుతం 30 శాతం వేతన పెంపు ఇచ్చే నిర్మాతలతో షూటింగ్లు యథావిధిగా కొనసాగుతున్నాయని ఆయన తెలిపారు. చిన్న నిర్మాతల ప్రపోజల్స్పై నిర్ణయాలను ప్రొడ్యూసర్స్ కౌన్సిల్ తీసుకుంటుందని, చిన్న సినిమాల నిర్మాతలకు తమ పూర్తి మద్దతు ఉంటుందని ఆయన స్పష్టం చేశారు. తెలుగు సినిమా పరిశ్రమలో చిన్న నిర్మాతలకు మద్దతు అందించడం ద్వారా పరిశ్రమ సమతుల్యంగా ముందుకు సాగుతుందని అనీల్ వల్లభనేని అభిప్రాయపడ్డారు. ఈ చర్చలు పరిశ్రమలో సానుకూల మార్పులకు దారితీస్తాయని ఆయన ఆశాభావం వ్యక్తం చేశారు.
